噚日下晝幾乎被個市催眠，五分鐘圖見保歷加通道橫行，喺去到臨尾大家都準備熄機時，指數忽然向下急跌，再次見到久違了嘅保歷加通道口拓闊，同步亦見Slow STC(14,3)兩線向下落到嚴重超賣水平，呢啲位真係好想吼隻好倉過夜，但當我發覺嘅時侯，望望鐘，搭正4點。
的確，有時候落場除咗技術之外，都要講求少少運氣，恒指今朝甫開市跌170點，開市報21910點，第一層牛證率先死亡，呢度街貨唔多，得37張期指街貨，牛證重貨區講緊係21500至21599點，呢度有相當於727張期指。唔通22000點嘅攻防戰就咁就玩完？
好明顯呢期係我運氣唔好，恒指低開之後旋即高走，連平時會向下一插再反方向推高而出現嘅下影線都無，取而代之嘅係一粒空心陰燭(低開高走陰燭)，即市作戰當然開好倉出動啦。嚟到依家9點47分，指數已經倒升過百點，升緊111點，報22191點。「哎呀！明明噚日諗住出好倉過夜架嘛，早少少見到咪好囉...」「又唔可以咁講嘅，出咗好倉過夜都要捱今朝完U後跌170點嗰一棍先得架」天使&魔鬼，你哋繼續慢慢嗌啦，經過被市場十幾年嘅洗禮，你估呢啲事第一次遇到咩；好聽啲叫「保持心態」，直接啲叫「睇到化晒」。
指數目前重上22000點樓上，睇嚟呢鋪22000點攻防戰應該係啱啱開始，噚日喺Live UAT場上以日線圖畫咗條「上升通道」出嚟，亦都有講過話略嫌指數、10天線同「上升通道」底線有啲距離，所以都不願出倉。到今日再畫，已經由「上升通道」開始變成「平頂三角形」，有待變嘅意思。
「咁即係指數唔願郁？」又真係事實喎，睇返恒指牛熊證街貨圖，唔計今日完U後就死嗰層牛證，其實牛熊兩邊嘅距離已經收到好窄，再唔係好似上個月咁最貼價熊同現價閒閒地都有800至1000點差距咁單邊，以今日見嘅最貼價牛熊兩層計中間價，即22099.5點，同依家10點19分嘅現價22084點，只係爭15.5點，而兩邊近街貨層嘅街量都唔係好多，隨時等多日睇下儲到返嚟嘅邊一邊街貨多先至出發都唔奇。
我哋就等下先啦，唔需要急住為呢個月嘅第一注負數嚟補鑊，愈急愈容易做錯事。
