今朝恒指高開低走見紅燈後，於五分鐘圖上見「雙底」+「長方形」，10點55分見指數確認上破「雙底」頸線+「長方形」頂線後，指數似乎重拾升勢，上半場尾段時間愈升愈有，保歷加通道整體向上，只要指數乖乖地喺保歷加上升通道裡面運行的話，爭少少又去番今日開市價。
噚日下晝幫我晝《傻寶》系列Cover嘅外甥女搵我；去到夜晚輪到佢家姐(都係我外甥女)搵我，呢位小姐雖然今年大學畢業，準備踏入社會工作，但無奈喺我眼中仍然都係一個小妹妹。小妹妹雖然唔係讀新聞，但就想入Media呢一行，所以噚晚Whstapp問咗我啲嘢，其中佢有一個小分享，我諗行內好多人都問過自己：「但係我仲諗緊係唔係真係做Media，好似好難有前途咁」，我唔清楚其他行業同Media係咪情況都差唔多，或者到你做到一定年資之後，行業嘅環境同前境會同依家有所不同。
下半場開市後，指數果然有一下抽高，高位見過20208點，即係話指數將第一層熊證街貨20100至20199點全數收回，呢度有相當於450張期指街貨，亦都係初初諗住指數靠近熊證街貨層時，但見指數向下跌，心諗咁近熊證無理由一層都唔殺嘅，就等到依家先嚟殺嘅一層。
睇返五分鐘圖見指數向上抽高創今日新高後，以見上影線姿態向下運行，依家1點17分，五分鐘圖上終於都見到指數踩住50分鐘線(五分鐘圖10線)，見指數今日咁升得，踩天線呢啲位都真係幾想出好倉追佢再上，呢啲位嚟偷當然係進取嘅表現啦，安全少少嘅可以考慮用條保歷加通道中軸嘅，因為整條保歷加通道呈上中，50分鐘線隨時陣亡but it’s not a big deal，如果中軸都守唔到的話，咁可以準備去Happy Hour啦！
恒指牛(65257)，收回價19800點，同現價有約350點差距，槓桿約44.77倍，爬格仔都夠用有餘，如果呢期你同我一樣都係有啲黑氣嘅話，paper trade玩住先啦。
