今朝個天仍然都係暗暗的，仲開始變得明顯清涼，我老媽都表示要拎多張墊出嚟用，反而我婆婆張電墊仲仍然喺個盒入面。我都怕我家肥貓唔夠脂肪保暖，所以都拎咗張毛毛墊比佢墊住瞓，大家出門都要小心呀！
恒指今早開市先升百鬆啲點，本來以噚日嘅收市價同噚日嘅10天線計，指數係略為低走於10天線，今日高開加上10天線Keep住向下運行之下，令到指數再次企返喺10天線之上。走勢上好似好美好咁，但以今朝恒指開市價15442點，對比牛熊街貨中間位15549.5點，指數擺位仍然靠近下方牛證街貨層，搞到我都唔敢喺開市前喺作戰室叫定好倉準備。
到正數開市之後，恒指二話不說地一支「大陽燭」向上直奔，好倉即追嘅同時亦用返一貫做法，就係開市即使嘅第一注永遠都係速食注，爬格仔為主；好快見到有戰友都成功爬到格仔，而恒指今朝都無令人失望，直奔衝上一度高見15800點樓上(@9點51分止)，好倉速度再追都真係無問題。
日線圖上見恒指今日架喺10天線同20天線之間，而20天線見15966點，依家10點1分，恒指暫時最高做過15873點，五分鐘圖上見開市半小時內全部都係陽燭後終於喺呢個高位見「平頂」，作戰室今朝呢注好倉做完食得到咁盡嘅話，應該可以收工熄機再去Happy Hour。
指數繼續踩入恒指熊證街貨層，就算今朝早有新貼價熊上市，但指數只係用咗半個鐘將噚日嘅失地全數收回後，今日所有新上市嘅熊證都已經被收回，同時都留意到牛證最貼價仍然都係15200點至15299點呢個範圍裡面，即係話下個星期一(11月7日)返嚟先唔會見到新增牛證街貨層，繼而指數繼續貼住熊證街貨的話，話唔定20天線都可以收復得到。
恒指牛 56561 ，收回價15200點，市場上最貼價牛證堆之中，槓桿最高(有約21.64倍)同街貨最少，依家10點8分，恒指上到15900點樓上，即第一層熊證15800至15899點全數死亡，呢度有相當於371張期指，指數搶到咁高中途再出牛的確增添幾分危險嘅成份，當然如果你可以睇得到市而動作快，搶到貨返嚟又識爬格仔嘅話，「Go for it. Get in front, not behind」！
否則，依家10點13分，五分鐘圖上見保歷加通道底開始呈橫行，即整條保歷加通道開始會變成整條向上嘅走勢，咁指數有機會稍稍回落到50分鐘線(五分鐘圖10線)或100分鐘線(五分鐘圖20縵)，到時見再有支持先至再偷位出動啦。
