今晚世界盃終於去到四強大戰，喺分組賽啱啱開始時已經聽我家老爺話，落咗注買阿根廷冠軍；不過，還記得唔知幾多日有晚發夢見到克羅地亞贏咗世盃冠軍，今晚阿根廷對克羅地亞，確實搞到我心癢癢想買克羅地亞晉級。
今朝恒指都同我一樣模稜兩可，開市跌5點，報19458點，所以作戰室喺開市之前都準備唔到啲乜嘢，真係要等真正開市之後，靠睇指數嘅走勢先至可以做到決定。
依家9點48分，恒指略為低開之後有向下衝至低位19382點，其後反方向拗腰向上，至依家9點50分，最高見過19542點，倒升逾70點。都話完U時個點數咁細，開市頭個半個鐘都係做下觀眾，比啲時間條指數自己Chok完先再算。
嚟到依家10點11分，指數跌轉升逾百點，最高暫見19600點，作戰室出動嘅好倉都見到有戰友爬完格仔，準備番佢哋公司嘅工作。
坦白講噚日恒指跌逾430點收市，擺位上係近返牛證街貨層，都確實係有諗過指數會再向下行去殺牛證街貨，但so far 見到指數只係輕輕踩過入19300至19399點嘅第一層牛就拗腰啦，日線圖上見「上升通道」由10月31日築起到依家，條底線只係甩過一次之後就遇強愈強。雖然Slow STC(14,3)由12月1日開始至今行出超買再超買嘅走勢，不過保歷加通道底線有向下拓闊，都算是一種通道口拓闊嚟比條件Slow STC(14,3)去行出超買再超買嘅，但說實話Slow STC(14,3)係好難好長期處於呢種狀態；之所以成日都話指數最「健康」嘅走法絕對唔係一口氣扯高/拉低，而係一浪X於一浪最為理想。又咁講，目前恒指保持住「上升通道」都成個半月咁滯，即管睇下佢點樣放寬條Slow STC(14,3)，比佢稍為回一回之後，再借返佢嘅力升多次。
恒指牛 65793 ，收回價19200點，同現價有逾370點距離，所以槓桿有約37.64倍，依家10點27分見小時圖重上10小時線(小時圖10線)，如果11點後有確認得到指數企穩於10小時線之上的話，小注落場博日線圖嘅「上升通道」底線推得返指數上「上升通道」中軸啦。
