噚日恒指上半場真係悶到發瘋，去到下半場1點45分左右先至叫做有啲嘢睇下，作戰室噚日沉住氣沉到喺呢個位先至出手。都話Day Trade唔係鬥出得幾密，而係鬥耐性同時間準確性。
今朝返嚟見恒指又係少少地開個裂口出嚟，落返去176xx點範圍開市。基本上今日指數郁一郁都有貨落肚，事關今日牛熊證街貨層兩邊得返一層17700型17799點嘅罅啫，而兩邊都有唔少街貨喺度，不過分布有啲唔同：熊證嘅比較集中於18200至18299點同18300至18399點，過千張期指儲成嘅重貨區同遠距離大嗌一句：打我呀！笨！係無分別；牛證方面就企得比較平均，每層都有大約有相當於400至600張期指街貨，齊齊整整，四四正正，同閱兵差唔多。
依家9點54分，作戰室已經完成第一注淡倉，指數一度失守17600點，第一層牛證亦已經死亡，依家見指數跌幅有所收窄，由頭先見最多13x點到依家跌93點，報17640點，五分鐘圖上見指數低位出咗「破腳穿頭」，不過頭頂有條10線，快手執完第一注之後大家都靜待10線阻力強還是「破腳穿頭」撐得起。
等到依家10點6分，應該都係「破腳穿頭」撐得起，指數跌幅縮窄至得返跌42點，開始返番去今朝開市第一粒燭嘅高位。比較在意嘅係小時圖上見Slow STC(14,3)出觸底，指數亦剛於開市首半個鐘下影線叉過落去100線後縮返上去，但佢個問題在於保歷加通道口收窄兼頭頂有條10線向下落緊，有似做阻力咁款。睇睇下個小時圖...唔係掛，點解畫到個「楔形」嘅！
再嚟到10點13分，指數喺五分鐘圖上見暫時被20/50線夾住，動彈不得，我哋都等緊佢向邊一個方向打而出貨。過到今朝高位嘅，好倉比出去快走一趟見保歷加頂線收工，大不了撞埋小時圖10線啫；唔過嘅，向下屈返落去的話再嚟多次淡倉，睇返今朝低位即17600點樓下水平算啦。
