如同噚日一樣，恒指今日再上演以高位開市，升4點後踩正9點半即見紅，半日跌344點，中午收市報17010點，而呢口價亦都係暫時全日嘅低位。
指數於今日期結日再向街貨方向發展，所以亦揀定隻恒指熊(60418)出嚟應市，講好可以進取地出場，安全注亦都只係等一等指數過唔過五分鐘圖10線。以今朝9點58分出文時間計，如常用10分鐘時間睇文的話，即於10點8分再睇返走勢圖，見指數稍回向住五分鐘圖10線方向出發，再等多五分鐘又再靠近啲，但都係未見上破10線，弱弱的大市只係留底上影線喺度，吼呢個位出隻(60418)的話，以10點15分起計用10分鐘作為買貨時間，期內(60418)高低位做過0.056元/0.051元，平均買入價為0.0535元。
呢注淡倉的確無Set目標價，但睇開文嘅都估到用得10線唔過作為買入位的話，就用返10線作為量度線，過指即走。至於目標價...又真係從來都唔係好Set，數主要嘅問題係我唔知你做緊乜或者將會做啲乜，如果你話一陣有個會要開，或者夠鐘要接細路放學放飯，甚至係約咗朋友High tea，anyway reason而令到你係無時間去睇市的話，有正數就應該收割。而如果你就係老闆、你好得閒可以睇住個市嘅，well，10線作為量度線你一早已知。
睇返今日全個上半場，指數係有掂過10線，只係未企到上去、未可以確認到係穿線啫，半場收工時見五分鐘圖保歷加通道口收窄，都係小心啲下半場，打完17000點攻防戰之後可能被夾返上去。
不過，睇下個街貨圖就知恐怖，今日指數暫時低見17010點，首三層牛證街貨確認全數被收回，呢度已經相當於2447張期指街貨。假設當目前只得10點生命值嘅17000至17099點都計埋落去的話，咁即係收回咗相當於3352張期指街貨。
終於等到下半場開市，見指數喺開市之後有稍稍過10線但仍然都係未見企穩，與此同時10線亦開始同20線靠近，睇下可唔可以借埋條20線返嚟同10線一齊做出雙線阻力；如果得嘅話，再下一步睇保歷加通道口有無拓闊，如果都成立的話，咁你手隻淡倉可以考慮繼續持有(或者你一早沽走咗嘅亦都可以考慮再追)，因為17000點一穿的話，貪心的淡倉會睇16800至16899點嘅重貨牛。
